اختار أحسن قلم..

اختار أحسن قلم..

مرة شاب راح لأب اعترافه وسأله وقاله: "ليه ربنا بيسمحلى إنى اختار حد وأحبه واتعلق بيه وفى الآخر ميكونش فيه نصيب واتعب أنا و هي!!؟"

فأبونا قاله حاضر هقولك بس في الأول هاتلى ورقة وقلم من جوا ع المكتب، وتعالى اقعد جنبى..

راح الشاب دخل بسرعة، وجاب قلم وورقة لأبونا وقعد جنبه..

راح أبونا مسك الورقة والقلم، وجه يكتب راح لقى سن القلم مكسور؛ فقاله سن القلم مكسور، ومش هعرف اكتب بيه.. أنت مش أخدت بالك ليه! ادخل ياللا هاتلي قلم تاني.

دخل وجابله قلم تانى وجه، وأبونا مسك القلم ولسه هيكتب في الورقة، لقى أن القلم طافح، فقاله القلم بايظ خالص.. أنت إزاى ماختش بالك منه! ادخل ياللا هاتلي قلم تاني.

دخل وجابله قلم تاني، وجه لأبونا..

أبونا مسك القلم وبيبص ع القلم لقى القلم فاضي؛ فقاله القلم فاضي.. أنت ليه ماختش بالك كويس، ادخل هاتلي قلم تاني.

راح دخل الشاب وقعد يدور كويس ع أحسن وأحلى قلم، وجابه لأبونا وقعد جنبه..

أبونا قاله بص يا حبيبى أنت صحيح تعبت لما كنت كل شويه بتدخل تجيب قلم وتيجي بس فى الآخر عرفت تختار أحسن وأجمل قلم نكتب بيه..

وربنا كمان بيسمحلك أنك تتعب وتختار غلط في البداية، وتكسب خبرة عشان في الآخر تقدر تختار أحسن قلم.. تكتب وترسم بيه حياتك.